თბილისის მერის, კახა კალაძის განცხადებით, თბილისის ვიცე-მერი გიორგი ტყემალაძე იქნება. ის აქამდე დედაქალაქის საკრებულოს თავმჯდომარის პოსტს იკავებდა.
„მინდა, ვიცე-მერის პოსტზე წარმოგიდგინოთ ადამიანი, რომელსაც დიდი წარდგენა არ სჭირდება. ის ჩვენი გუნდის ერთ-ერთი გამორჩეული ლიდერია – წლებია ჩართულია ყველა იმ საქმიანობაში, რასაც ქალაქის განვითარება და აღმშენებლობა ჰქვია. მინდა, წარმოგიდგინოთ გიორგი ტყემალაძე. ის ორი მოწვევის საკრებულოს თავმჯდომარე გახლავთ. ყველა პროექტი, რაც ხორციელდება და გაკეთდა დედაქალაქში, რა თქმა უნდა, საკრებულოს და უშუალოდ გიორგის მონაწილეობით განხორციელდა. დარწმუნებული ვარ, მისი კვალიფიკაცია, მისი ჩართულობა, დაგვეხმარება და გავაგრძელებთ იმ წამოწყებულ მნიშვნელოვან საქმეებსა და პროექტებს. მინდა, მას წარმატება ვუსურვო ამ მნიშვნელოვან თანამდებობაზე. საკმაოდ ამბიციური გეგმები გვაქვს. გიორგიმ კარგად იცის თვითმმართველობას რამდენად დიდი მნიშვნელობა აქვს“, – განაცხადა კალაძემ.
კალაძემ გაწეული საქმიანობისთვის მადლობა გადაუხადა უკვე ყოფილ ვიცე-მერს, ირაკლი ხმალაძეს. ხმალაძე „ოცნების” იუსტიციის მინისტრის მოადგილედ დაინიშნა.
